Nota de prensa
O Plan do Litoral contempla a necesidade de conservar as agrupacións tradicionais costeiras como Rinlo, no concello de Ribadeo
a xunta potenciará o núcleo de rinlo a través dun plan director que inclúe actuacións en equipamentos urbanos, rede viaria e vivenda, por un importe de 1,2 millóns de euros
* Hernández anuncia que a primeira actuación do Plan Director será o acondicionamento do parque de Santa Catalina, obra á que a Xunta destina 100.000 euros
* Prevese a aceleración da redacción e aprobación definitiva do Plan Xeral de Ordenación Municipal (PXOM) no que se formulará un plan detallado para o casco de Rinlo
* Desconxestionarase a rede viaria, propoñendo un sentido único na vía principal do casco ou mellorando o espazo habilitado para aparcamento
* En relación á edificación, apostarase por conservar a imaxe tradicional do conxunto, manter os inmobles de interese, rehabilitar construcións en ruína ou reducir a porcentaxe de vivendas baleiras
* O proxecto contempla a potenciación da ruta praia das Catedrais- Rinlo- Ribadeo así como a mellora do acceso á praia de Areosa
* Na Mariña Lucense o Plan do Litoral analizou un total de 56 solos urbanizables correspondentes con 1.580 hectáreas, dos que 44 (1.543 ha) non son compatibles e necesitarán reformular o seu desenvolvemento para adaptarse ao POL
En total o POL caracterizou 170 núcleos ao longo do litoral como NIL, por responder a asentamentos tradicionais cuxa localización estratéxica no bordo costeiro e nas rías confírelle unha singularidade que lles fai merecedores dun tratamento especial.
Plan Director
En consonancia coa defensa dos valores de conservación e recuperación dos núcleos tradicionais que contempla o POL, a Xunta de Galicia desenvolverá, cun investimento de 1,2 millóns de euros, o Plan Director de Rinlo, cuxa primeira actuación será o acondicionamento do parque de Santa Catalina, proxecto que contará cun investimento de 100.000 euros por parte da Xunta, segundo puxo de manifesto o conselleiro de Medio Ambiente, Territorio e Infraestruturas esta mañá, nun acto no que tamén estivo presente o alcalde de Ribadeo, Fernando Suárez Barcia.
Na actualidade, este parque dispón dunha área infantil no centro, unha superficie para o estacionamento e unha vía perimetral. A proposta da consellería é eliminar o estacionamento, manter o parque e permitir o paso de vehículos, pavimentando e colocando mobiliario urbano.
O Plan Director de Rinlo, enmarcado no Plan Hurbe, ten como obxectivo revitalizar esta zona costeira de Ribadeo, mellorando a súa imaxe mediante o acondicionamento de equipamentos, rede viaria ou vivenda. A consecución dunha mellor imaxe redundará no incremento das visitas turísticas, potenciando así o desenvolvemento económico e social desta localidade.
O titular de Infraestruturas sinalou que resultará fundamental a delimitación clara do casco urbano mediante operacións de urbanización e construción que contribúan á definición física dos seus bordes. Prevese a aceleración da redacción e aprobación definitiva do Plan Xeral de Ordenación Municipal (PXOM) no que se formulará un plan detallado para o casco de Rinlo.
En relación á edificación, apostarase por conservar a imaxe tradicional do conxunto, manter os inmobles de interese, rehabilitar construcións en ruína ou reducir a porcentaxe de vivendas baleiras. O plan fai fincapé en non permitir o abandono nin a demolición de muros tradicionais así como en revestir de pedra os muros existentes de bloque.
A rede viaria tamén é un punto fundamental neste plan, polo que se pretende desconxestionar e racionalizar o tráfico. Proponse un sentido único na vía principal do casco e da ponte, a peatonalización parcial, a potenciación dunha vía que actúe de circunvalación do centro ou a mellora do estacionamento. No casco de Rinlo existen rúas en mal estado e con materiais discordantes, motivo polo que se prevé cambiar o asfalto por pedra ou renovar as instalacións e mobiliario destas.
O Goberno galego é consciente de que as praias de Ribadeo significan un importante reclamo turístico que como xa se explicou redunda no desenvolvemento económico e social desta zona da Mariña Lucense. Deste xeito, o Plan Director contempla a potenciación da ruta turística Praia das Catedrais- Rinlo- Ribadeo, xa que actualmente a maioría dos turistas non fan paradas en Rinlo. Tamén se facilitará o acceso á praia da Areosa, que a día de hoxe atópase deteriorado. Outras actuacións contempladas no plan son a renovación do pavimento e mobiliario urbano do Campo de San Pedro e da Praza de Calvo Sotelo.
O POL na Mariña
Na Mariña Lucense o Plan de Ordenación do Litoral analizou un total de 56 solos urbanizables correspondentes con 1.580 hectáreas. A análise realizada achou 12 solos (cerca de 37 hectáreas) que son compatibles cos criterios do plan e un total de 44 solos (1.543 ha) que, ao non ser compatibles, necesitarán ou ben adaptarse ao POL, ou ben reformular o seu desenvolvemento ou o propio plan xeral.
As cetarias de Rinlo
Unha das grandes apostas do POL é recoller os elementos (construcións e instalacións) vinculados ao mar como medio de produción, moitos dos cales se perderon ou caeron en desuso por non cubrir as demandas actuais. Neste senso, o documento que vén de aprobar a Xunta aposta pola súa conservación, mediante a busca de novos usos que respecten a súa memoria, conserven a súa identidade e dinamicen outros sectores como os culturais.
Segundo recolle o propio documento de ordenación do litoral nas súa estratexias de actuación, en Rinlo as cetarias (viveiro de crustáceos, situado en comunicación co mar) “son mostra da intelixente lectura do cantil” que formaba pequenas piscinas, idóneas para estas prácticas. Para que esta produción fose posible, necesitábase enxeñar un sistema de defensa contra o mar. Os mesmos muros que os campesiños utilizaban para evitar o spray mariño farían este litoral apto para o cultivo de crustáceos. Hoxe en día, xa obsoletas, substitúense por plantas de acuicultura.
Neste senso, o POL aposta por analizar as tipoloxías dos elementos patrimoniais, como son as cetáreas para entender o seu funcionamento e configuración, así como destacar as características esenciais para o seu mellor entendemento. Deste xeito, os novos usos propostos responderán ás necesidades do concello e o seu contorno. Neste caso considéranse como usos compatibles un centro de investigación-ensino (I+D+I), centro de interpretación así como usos relacionados coa restauración e servizos.
O obxectivo é manter vivo -mostrar e conservar- este patrimonio á sociedade, fomentando a súa función cultural e identitaria, e achegando o litoral á poboación. Non se trata de musealizar senón de compatibilizar novos usos, froito de necesidades actuais dos concellos, co carácter e a natureza do elemento que se desexa valorizar e a paisaxe na que se integra.