Nota de Prensa
NEVES CANDO FAI UN BALANCE MOI POSITIVO DAS ACTIVIDADES DE VERÁN ORGANIZADAS PARA OS NENOS E OS MOZOS EN BURELA. A EDIL DESTACA A GRANDE PARTICIPACIÓN E ACEPTACIÓN QUE ESTÁN A TER.
Cando sinalou que “despois de que xa levamos máis dun mes dende que comenzaron as actividades de verán que realizamos dende as delegacións de Benestar Social, Deportes e Xuventude cómpre facer balance e este non pode ser máis que positivo e satisfactorio, pola grande participación e aceptación que están tendo estas nosas actividades”.
A edil nacionalista subliñou que “comezando pola ocioteca, que por segundo ano consecutivo desenvolvemos para ofrecer aos pais e nais que traballan durante o verán a posibilidade de apuntar aos seus fillos e fillas a actividades lúdico formativas durante toda a mañá. 28 nenos e nenas participan nesta ocioteca que se desenvolve na Casa da Xuventude de 9 a 14 horas e ata a primeira semana de setembro e na que hai actividades sobre medio ambiente, lectura, expresión dramática, psicomotricidade ou coeducación”.
Neves Cando seguiu a relatar que “nas actividades deportivas arredor de 40 nenas e nenos participan tódolos días en patinaxe, batuka, aerobic, xogos paradeportivos ou xogos na praia. E para o tramo de idade da mocidade xa se desenvolveron os talleres de pintura, de baile e de teatro, con mais ou menos 20 rapaces e rapazas participantes”. A responsable de Deportes lembrou que “xa para rematar estas actividades de verán quédanos pendente este vindeiro sábado día 14 a carreira popular e o sábado 21 de agosto o día da bicicleta”.