O rexedor dixo que “vivín en primeira persoa e me preocupa moito como alcalde e como veciño o que aconteceu onte. Trátase da situación dun dos inmobles que se atopa en pleno casco vello e que desde hai tempo ten perfilada a súa resolución. Estou falando do antigo colexio das monxas que nos tempos do anterior goberno autonómico foi cedido polo Bispado de Mondoñedo-Ferrol ao Xacobeo para a conversión nun auténtico albergue de peregrinos, digno dun concello como o de Ribadeo que é porta norte do Camiño de Santiago na súa entrada a Galiza”.
Suárez Barcia entende que “as cousas deben levar o seu tempo, pero agora este proxecto de rehabilitación xa foi consumado, a Xunta non ten máis que licitar as obras de inmediato sen máis dilación e digo todo esto porque na tarde de onte caeu unha parte moi importante da súa cuberta e desplomóuse unha parte da estructura deste inmoble, que está derruido desde hai tempo. Eu como veciño de Ribadeo estaba onte pola tarde andando pola rúa Trinidade, escoitei unha serie de ruidos que me fixeron apartarme un pouco deste edificio e puiden presenciar como se viña abaixo esta estructura, cun ruido enxordecedor tremendo, cunhas vibracións que pareceía un terremoto, o que ocasionou que numerosos veciños da rúa Trinidade e da rúa Ibáñez, que están na parte traseira deste inmoble, saisen alarmados á rúa para ver o que acontecía”.
O alcalde sinala que “onte non pasou nada, todo quedou nun susto ainda que estructuralmente quedou afectado este inmoble e agora queda outra parte que se pode vir abaixo en calquera momento o cal pode provocar que incluso se poida mover a fachada e que poida caer e teñamos que lamentar danos maiores a bens ou a persoas. Eu acabo de facer unha serie de comunicacións verbais e por escrito aos responsables tanto do Xacobeo, como da Consellería de Cultura e tamén ao seu xefe territorial en Lugo para que axilicen as obras de rehabilitación e as adxudiquen canto antes porque xa non é que este inmoble chegue para o Xacobeo de 2010, é que este edificio tal e como está pode provocar unha catástrofe, estamos correndo un serio risco de que se veña abaixo e ocasione danos máis importantes que os que onte sucederon”.