SANTIAGO .- O conselleiro de Medio Ambiente, Territorio e Infraestruturas, Agustín Hernández, afirmou hoxe no pleno do Parlamento que “por primeira vez, a VAP da Costa Norte vai contar con prazos realistas dende o punto de vista técnico e orzamentario”.
Nota de Prensa
HERNÁNDEZ AFIRMA QUE A VAP DA COSTA NORTE CONTA POR PRIMEIRA VEZ CON PRAZOS REALISTAS DENDE O PUNTO DE VISTA TÉCNICO E ORZAMENTARIO
Santiago, 10 de decembro de 2009.- O conselleiro de Medio Ambiente, Territorio e Infraestruturas, Agustín Hernández, afirmou hoxe no pleno do Parlamento que a anterior Xunta é a responsable da parálise na que estaba sumida a Vía de Altas Prestacións da Costa Norte, xa que foi quen suspendeu no segundo semestre de 2008 os proxectos construtivos de tres tramos desta vía. Esta paralización afectou a máis de 40 quilómetros, dos que 20 son do treito que discorre entre San Sadurniño e o Campo do Hospital -contrato suspendido dende agosto de 2008-; un total de 8 quilómetros do tramo Campo do Hospital-AC-101; e 12,5 quilómetros do tramo que vai dende Os Ramos ata Covas -contrato suspendido dende novembro de 2008-.
Explicou que en agosto de 2005 deixouse listo o estudo informativo e de impacto ambiental de todos os tramos entre Ferrol e San Cibrao. Por outro lado, tamén quedaran en fase de redacción de proxecto os tramos San Sadurniño – Campo do Hospital, Variante de Ortigueira e Celeiro-San Cibrao.
A Consellería de Política Territorial, Obras Públicas e Transportes -aclarou- tan só avanzou nos dous tramos que agora se atopan en obras (a variante de Ortigueira e o treito Celeiro-San Cibrao), que supoñen tan só o 21% de todo o trazado, mentres que o resto dos treitos apenas avanzaron. “Dase a circunstancia de que a conselleira que se reunía cos alcaldes para contarlles que a estrada estaría rematada en 2011, mentres o seu departamento procedía a paralizar a redacción dos proxectos desta infraestrutura”, afirmou Hernández.
Asegurou que “o mesmo Goberno que foi quen de elaborar o Plan Viario Ferrol-Eume-Ortegal- A Mariña e poñer en marcha seis das oito actuacións contempladas, será agora o que faga realidade esta vía”. Enfatizou ademais que “por primeira vez, a VAP da Costa Norte vai contar con prazos realistas dende o punto de vista técnico e orzamentario”.
Transparencia, rigor e verdade
Agustín Hernández recordou que a semana pasada asistiu a unha reunión na que participaron representantes de todos os concellos da provincia da Coruña e Lugo polos que pasa esta infraestrutura de gran relevancia para a zona norte de Galicia: Ortigueira, Neda, Narón, San Sadurniño, Moeche, Cerdido, Cariño, Mañón, O Vicedo, Viveiro e Xove. Destacou que a súa pretensión e actuar con transparencia, rigor e verdade. Explicou aos responsables municipais que o Goberno galego tivo que acomodar a planificación desta vía de alta capacidade ao estado existente na tramitación dos proxectos que deixaron feito os responsables do Goberno bipartito.
Nese senso na reunión da semana pasada concretou os prazos de execución e comprometeuse a manter unha reunión cada seis meses cos alcaldes “para dar conta, ante eles e ante os cidadáns, dos avances realizados e da situación das obras”.
O 67% da VAP en servizo en 2013
Destacou que o 67% da VAP da Costa norte estará en servizo ou en obras no ano 2013, porcentaxe que se elevará ao 80% en 2014. Lembrou ademais que a Xunta de Galicia incrementou nun 16% os recursos financeiros para a Vía de Altas Prestacións da Costa Norte entre Ferrol e San Cibrao, respecto da cifra de 2009.
(Consultar táboa1 en descargar arquivo)
Segundo informou, no momento de traspaso de poderes (abril de 2009), o Goberno galego tan só levaba certificado 1,5 millóns de euros dos 16,9 consignados dende o ano 2006 para a VAP do Norte (10 millóns para os tramos da provincia da Coruña e 6,9 para os da provincia de Lugo), é dicir, o 9% dos orzamentos totais, o que vén a demostrar que nese tempo practicamente non se avanzou na tramitación desta infraestrutura.
Preocupación polos tramos estatais
O conselleiro de Medio Ambiente, Territorio e Infraestruturas salientou que nesta vía o Goberno central tamén ten responsabilidades, xa que o Ministerio de Fomento encárase da construción do tramo entre San Cibrao e Barreiros. Este último treito, que se construirá como autovía, leva varios anos en fase de estudo informativo. O pasado 23 de xuño publicouse no Boletín Oficial do Estado (BOE) dito documento, que agora se atopa na fase de análise de alegacións. Ademais, o Goberno Central consigna nos orzamentos de 2010 un total de 10.000 euros para esta actuación, o que implica a paralización do treito da súa competencia, concluíu.
En definitiva, a Xunta vai continuar impulsando este itinerario entre Ferrol e San Cibrao para cumprir co seu compromiso de rematar esta infraestrutura nos prazos marcados, explicou, ao que engadiu que se fará sen demagoxia e sen fariseísmo, senón co realismo e co rigor que vai presidir esta nova etapa na planificación e na execución das infraestruturas de Galicia.
Situación actual e prazos do Plan Move
(Consultar táboa2 en descargar arquivo)
O conselleiro comprometeuse de novo a manter unha reunión cada seis meses cos alcaldes “para dar conta, ante eles e ante os cidadáns, dos avances realizados e da situación das obras”.