A MARIÑA .- A delegación mariñá da plataforma Queremos galego, que agrupa 33 colectivos, cualifica de histórica a manifestación que se celebrou o domingo en Santiago de Compostela en defensa da lingua de este pais. Queremos galego “ábrese unha nova etapa na defensa da lingua”.
Nota de Prensa
Queremos Galego, diante da histórica manifestación, destaca que se abre unha nova etapa na loita polo galego
Os manifestantes ateigaron varias veces a Praza da Quintana
3000 mariñaos participaron hoxe en Compostela na defensa da lingua
Máis de 3000 mariñaos participaron na xornada de hoxe na manifestación convocada en Santiago de Compostela pola “Plataforma Queremos Galego” da que tomaron parte máis de 100.000 persoas, “que ateigaron varias veces a Praza da Quintana”, procedentes de diferentes puntos de Galiza. Os Mariñaos que acudiron hoxe a Compostela desprazáronse maioritariamente en transporte particular, se ben de diferentes localidades da Comarca da Mariña partiron un total de 8 autobuses. Neste sentido Ramón Ermida destacou o carácter histórico en canto asistencia desta mobilización que sobrepasou en canto a presenza as convocadas no seu dia pola “Plataforma Nunca Máis” en protesta pola xestión que da crise do Prestigue fixo o Goberno de Fraga.
Ermida fixo referencia ao toque de atención que a sociedade galega lle deu a política lingüística da Xunta de Galiza e urxiu ao Goberno de Feijoo a que volva ao consenso sobre o idioma expresado polo Plano de Normalización Lingüístico aprobado por unanimidade no Parlamento de Galiza. “Non podemos consentir que desde unha institución que nace ao abeiro dunha lei orgánica”, en referencia a Xunta, “que entre os seus obxectivos se marca a promoción da lingua galega, se proceda agora a un ataque contra o idioma sen precedentes desde o final do franquismo” afirmou Ermida, quen recordou a crítica situación que vive o idioma galego nomeadamente nos ámbitos urbanos e nos segmentos máis novos da sociedade galega.
O voceiro de “Queremos Galego”, que destacou a importante presenza de xente moza no cortexo mariñán e no conxunto da manifestación, afirmou que a mobilización fixo patente a vontade de amplos sectores da nosa sociedade de “ transformar en enerxía a prol da defensa do noso idioma, elemento central da nosa existencia colectiva, a gran preocupación que a actual política lingüística do goberno galego ten creado en amplos sectores da sociedade. Instamos ao noso pobo a moverse a favor de aquilo que nos une e identifica, que nos sitúa as galegas e os galegos no mundo no mesmo nivel que as outras culturas do planeta, aquilo que nos fai universais: a nosa lingua”.
Na mesma liña desde “Queremos Galego” na Mariña hoxe saíu a rúa esa “inmensidade de xente” que, segundo dixo, “quere o galego” mais que “considerou que a normalidade da lingua era unha batalla xa superada”. “Agora”, dixo, “moitas comezan a decatarse de que volve facer falta moverse na súa defensa, labor onde cómpre a presenza de todas e todos”. Nese sentido, tamén demostrou que a mocidade, esta disposto a coller “o testemuño da defensa do galego”, igual que a “maioría galegofalante do electorado do PP, a que non comparte a liña que está a seguir o seu partido en materia de lingua”.
A delegación mariñá de “Queremos Galego”, que agrupa a 33 colectivos da Comarca, quixo facer fincapé que “coa mobilización de hoxe ábrese unha nova etapa na defensa da lingua posto que non imos consentir de xeito pasivo a operación de xenocidio lingüístico que leva adiante o Goberno de Feijoo. A lingua é patrimonio de todos os galegos, vehículo de comunicación de moitos deles, polo que o Goberno Feijoo debe respectala”. Neste sentido deste a Plataforma anunciouse que na próxima semana a mesma volverase a reunir para definir as actividades que van levar adiante.