Nota de Prensa
Ausencia de compromiso con Xove nos Orzamentos do 2010
O responsábel local do BNG de Xove, Marco López, manifestou que o bloque xovense segue a agardar polo plan de choque anunciado polo PP na campaña electoral para combater os problemas laborais e de desemprego: “Agardamos solucións e non propaganda dun goberno galego sen capacidade ningunha para dar solucións aos problemas reais da nosa sociedade”.
Marco López sinalou que da proposta de investimentos no Concello de Xove que a fronte nacionalista local remitiu á Xunta “non se vai acometer nin a primeira” e manifestou que “desde o PP encetaron unha campaña de engano masivo inchando uns números que non son os que se reflicten no papel”.
Neste sentido lembrou o potencial económico de Xove “que se por algo se caracterizou historicamente é por ser unha vila mariñeira e industrial” pola presenza de importantes enclaves industriais como o de Alcoa e por unha actividade baseada en sectores como a pesca, a explotación forestal, mantenza, comercio téxtil, madeira, transportes e outros servizos básicos cuxo desenvolvemento futuro está moi condicionado á mellora das infraestruturas viarias. A parálise endémica na execución de infraestruturas públicas ten efectos demoledores na reactivación da economía e a creación de emprego. O responsábel local do BNG incidiu en que “nós aquí témolo peado para podermos vivir do turismo”.
A proposta de investimentos da Xunta de Galiza no concello elevada polo BNG de Xove é, entre outras, a que segue:
–Reforzamento da liña electrica de Penasagudas, parroquia de Monte.
–Ampliación do Polígono Industrial de Camba.
–Apertura do dique norte de Alcoa ao tráfico portuario.
–Cinturón Industrial nas inmediacións de Alcoa.
–Construción do dique de abrigo e dos pantaláns en Morás.
–Reforma da rampa e instalación un aparello motorizado para facilitar a tarefa de sobordar as embarcacións de tonelaxe medio en Morás e Portocelo.
–Construción de 60 novas vivendas sociais ou compra para VPA en Palmeiro.
–Construción de depuradoras axeitadas (Caínzos, Sumoas) e saneamento integral do concello.
–Ampliación e mellora da estrada P-26-05
–Restauración da Rota dos Muíños da Rigueira.
–Construción dunha área recreativa no monte Pedralva.
–Reconstrución das ruínas de San Tirso en Portocelo.
Marco López, esixiu ao Partido Popular o cumprimento dos compromisos adquiridos durante a campaña electoral cos veciños de Xove e esixiu a recuperación do proxecto para creación do cinto industrial de Alcoa a que se comprometera o PP antes das eleccións: “Non pode ser que o que antes era a solución para afrontar a crise de emprego na Mariña, e nomeadamente en Xove, agora sexa a propia crise a que o desbote”. Marco López, demandou do goberno municipal de Xove a esixencia diante da Xunta de Galiza do cumprimento do acordo plenario no que se demandaba esta infraestrutura hai escasos meses e que o BNG apoiou conscientemente e sen condicións no pleno da Cámara Municipal. Tamén incidiu en que “os recortes no investimento público frean a capacidade do desenvolvemento económico e por tanto afondan na destrución de postos de traballo en Xove e, en xeral, en toda a Mariña”.
Do mesmo xeito, criticou que, para colmo de males, “este goberniño está a desmantelar dous servizos básicos en materia sanitaria para a nosa vila como é o Hospital da Costa, ao non consignar as partidas necesarias para levar adiante proxectos que xa estaban elaborados polo anterior goberno, e mais os Servizos Sociais, coa ausencia de consignación nos presupostos das actividades do Consorcio Galego de Servizos de Igualdade e Benestar”.