O rexedor sinalou que “nesta importante e primeira visita institucional do Presidente da Deputación de Lugo a Ribadeo, que contou coa presencia de membros de tódolos grupos da corporación e eu, como alcalde, pedínlle unha serie de asuntos de relación directa coa propia Deputación Provincial xa que se nos fai moi necesaria a súa presencia aquí en Ribadeo”.
Fernando Suárez explicou que “primeiramente, xa dende xaneiro deste ano 2009 pedímoslle formalmente que, por mor daquel ciclón Klaus que tanto destrozou e deteriorou moitos camiños municipais, nos trouxeran o parque de maquinaria da Deputación Provincial a Ribadeo, igual que a outros Concellos da Provincia, para que nos botara unha man e así complementar todo este gran esforzo que estamos facendo con outro tipo de fondos do Estado, da propia Deputación e tamén da propia Xunta, pero todo se fai necesario dado o gran número de camiños e gran rede quilométrica que ten Ribadeo. É necesario que o parque de maquinaria da Deputación tamén nos bote unha man en canto a motoliberadora, en canto a bacheo, etc, etc. Temos o compromiso alto e claro por parte do Presidente de que antes de que veñan as chuvias de novo, antes do inverno, vai estar aquí esta brigada para botarnos unha man neste sentido.
Suárez pediu ao Presidente da Deputación “un especial coidado e estudo do que é a ponte que hai no lugar de O Cobo, en Ove. Esta ponte que cruza a vía do tren e que é titularidade da Deputación Provincial de Lugo, é de acceso obrigado da maioría das parroquias do interior que queren vir á vila de Ribadeo, que teñen que pasar por aí. É unha ponte moi estreita, que cando se cruzan dous coches, os peatóns que van polas súas beiras corren un serio perigo, e non é soamente iso, senón que están tamén os nenos que van entrenar por aí aos campos de fútbol que temos do outro lado da vía do tren e tamén os veciños de Obe que van andando moitas veces. Por todo isto, lle pedimos unha especial atención para que logre ampliar esa ponte”.
O alcalde ribadense fixo fincapé en que “no seguinte Plan de Obras ten que dar unha volta, unha nova capa de aglomerado asfáltico ao que é a estrada de Vilaselán, titularidade da Deputación Provincial de Lugo e que, xa directamente, se inserta na nosa rede urbana, alí pola zona da Lodeira. Esta estrada está nunha situación precaria e é necesario que a Deputación acometa obras canto antes”.
Fernando Suárez suliñou que “finalmente, unha cuestión que nos preocupa moito, é o tema da praia de As Catedrais, dado que é importante esta situación que sempre decimos, de que cada ano vén máis xente, de que non son centos senón miles, milleiros de persoas e vehículos, os que non soamente en época estival, senón durante todo o ano, acuden a ese areal. Pedimos que a institución exceda un pouco a competencia municipal aínda que a praia é municipal, é de Ribadeo, realmente pola súa situación e o número de visitas é un problema que require de tódalas administracións porque se non esa praia pódese degradar ata o punto de chegar a morrer de éxito, como temos dito moitas veces. Si ben valoramos, que a Deputación Provincial este ano contribuíse a financiar un punto de información turística que por primeira vez se puxo alí na praia, tamén queremos que se acometan as obras de mellora, de reforzo do vial que pasa por alí. O propio Presidente da Deputación comprometeuse diante de tódolos membros da corporación a nun prazo de dous ou tres meses levar adiante o proxecto de reformulación de todo ese vial, co cal esperemos que para o verán do 2010 esté nunha situación moito mellor e moito máis razonable para poder soportar esa cantidade de xente que durante todo o ano visita o areal”. Suárez engadiu que “foron catro cousas moi importantes para Ribadeo as que lle pedimos e contamos coa súa cercanía. Penso que neste caso non nos vai defraudar porque defraudaría a Ribadeo”.