Nota de Prensa
O final do verán
Estamos a piques de que finalice outro verán máis. Como todas as estacións, o verán caracterízase por ser un período cíclico, que cada ano repítense as mesmas situacións, algo que en Foz é moito máis evidente que noutros lugares. Os veraneantes, os turistas, os días de sol e praia, os paseos, o ambiente nocturno, os amores de verán, as festas do Carmen e de San Lourenzo… situacións que chegan con verán e que con verán marchan. Pero, desgraciadamente, non todas as experiencias estivais cíclicas son positivas na nosa vila, como é o caso dos atascos, dos semáforos que non funcionan, dos aparcamentos inadecuados… o caos circulatorio, en resume, que como cada verán se incrementa en Foz sen que pareza poñerse medida algunha por parte do Concello para remedialo.
Desde a Asociación de Veciños “O Castro” de Foz puxemos en coñecemento do Alcalde na reunión con el mantida o pasado 13 de abril as nosas preocupacións que con respecto á ordenación do tráfico e seguridade cidadá nos invadían pois o verán estaba próximo e con el a probabilidade do incremento dos problemas circulatorios e de aparcamento que caracterizan á nosa Vila. Ese día aseguróusenos que se trataría na Xunta de Seguridade que estaba próxima a realizarse e que se poñerían as medidas efectivas para atallar o problema.
O pasado 24 de xuño, xusto no principio do verán, esta Asociación presentou un escrito no Concello advertindo do perigo de certos cruces de rúas no casco urbano de Foz, fundamentalmente debida á falta de visibilidade polo aparcamento incorrecto dos vehículos. A título de exemplo nese escrito indicouse unha serie de cruces que esta Asociación tiña constatado como os máis problemáticos pois os estacionamentos facían que para incorporarse dunha vía a outra os vehículos debían entrar demasiado na vía á que pretendían acceder co conseguinte risco de choque e incluso atropelo de peóns. Solicitábase nese escrito o cumprimento estricto da normativa de tráfico, debendo recorrer ás sancións de ser necesario, así como o establecemento de franxas de prohibición de estacionar que respectasen as distancias establecidas legalmente.
Nin das advertencias feitas na citada reunión nin da solicitude realizada por escrito, e debidamente rexistrada, non se recibiu resposta algunha: nin por escrito do Concello nin polos seus feitos, pois durante todo o verán padecemos os mesmos problemas que cada ano se presentan. A Asociación de Veciños “O Castro” non ten constancia de si se produciron colisións, pero si fomos testemuñas, e incluso protagonistas, de situacións de auténtico perigo nos cruces, así como puidemos constatar como durante todo o verán os vehículos estacionaron do modo que ós seus propietarios lles apeteceu (sobre pasos de peóns, en vados permanentes, sobre as beirarrúas, nas proximidades dos cruces…) sen que se fixese nada por evitalo.
Unha vez máis, desde a Asociación solicitamos que se atalle esta situación do mellor xeito posible. Unha vez máis dicímoslle ó Álcalde e á corporación que non pedimos máis medios, pois sabemos que é difícil conseguilos tendo en conta a situación económica en que nos encontramos, pero si pedimos a optimización dos recursos existentes, xa que se estes se utilizan segundo criterios de calidade e productividade, a súa efectividade aumentará e pouco a pouco iremos suavizando o caos circulatorio que se repiten cada ano.