RIBADEO (FNC) .- O concelleiro de Economía e Facenda e voceiro do BNG no Concello, Vicente Castro, cualifica de peculiar e pintoresca a folga que manteñen os vendedores ambulantes do mercado semanal de Ribadeo. O edil nacionalista di que “cando hai negocio como foi o caso do Nadal saltáronse a folga e montaron os postos e cando hai unha época de vacas fracas coma o mes de xaneiro e de mal tempo volven á folga e non montan os postos. Isto é unha maneira un tanto pintoresca de facer folga”.
Castro engade que “gran parte da culpa do que está a pasar tena a oposición por entrar no xogo no que entrou. Nós pedímoslle á oposición que actúe conforme á liña que está a manter e que presenten unha proposta alternativa de xeito inmediato. De non ser así que nos deixen actuar a nós na liña na que viñamos actuando”.