Nota de Prensa
XUNTA E DEPUTACIÓN INCUMPRIRON OS SEUS COMPROMISOS PARA A POSTA EN MARCHA DOS PARQUES DE BOMBEIROS NA MARIÑA LUCENSE
o “Empezaron a casa polo tellado”: A Deputación procede á adquisición duns camións nodriza antes de dispoñer dos vehículos contraincendios de primeira intervención que tecnicamente son moito máis prioritarios.
o Como unha mostra máis do desprezo da Xunta á nosa comarca Sanidade obriga ás asociacións veciñais que queiran formar parte da comisión de participación cidadá a integrarse na Federación provincial.
A Mariña, 03 de outubro de 2008.- Alcaldes, deputados provinciais e o parlamentario autonómico do PPdeG na Mariña lucense participaron nunha rolda de prensa na que puxeron de relevo que tanto o Executivo autonómico como a Deputación provincial non cumpriron os seus compromisos para a posta en marcha dos parques de bombeiros na nosa comarca. Tres anos despois de que o bipartito accedera á Xunta de Galicia e tempo despois de que PSOE e BNG adquiriran responsabilidades de Goberno no ente provincial “nada se ten feito”. Nin o parque de bombeiros de Barreiros entrou en servizo no primeiro trimestre do 2008, tal e como afirmou a vicepresidencia da Deputación, a socialista Lara Méndez, nin comezou a construción do parque de Barreiros, tal e como comprometeu o conselleiro de Presidencia, o socialista Méndez Romeu, no 2007”.
Pero sen dúbida, a situación máis esperpéntica foi a adquisición por parte da Deputación provincial de varios camións nodriza, aqueles que almacenan auga na súa cisterna para despois trasladala aos camións contraincendios tradicionais. Os populares entenden que o Goberno provincial está a “empezar a casa polo tellado”, idea na que coinciden con todos os expertos. “O prioritario desde o punto de vista técnico sería adquirir os vehículos contraincendios de primeira intervención, isto é, aqueles que chegan nun primeiro momento ao lugar do sinistro e non os nodriza, que son complementarios e moito menos importantes”.
Os populares da Mariña emprazan á Xunta de Galicia e ao Goberno provincial a abandonar a súa actual posición de desinterese pola nosa comarca e fan un chamamento a ambos Executivos para que adopten un compromiso firme coa creación e posta en marcha dun servizo de emerxencias “axeitado ao século no que vivimos”. Neste senso, esixen que tanto as contas autonómicas como as provinciais reflictan as partidas orzamentarias necesarias para levar adiante cada un dos novos parques.
“A socialistas e nacionalistas acabóuselles a escusa de botar as culpas ao PP. Agora é a súa responsabilidade. E, malia que a lei prevé que Xunta e Deputación deben garantir estes servizos de emerxencia e de loita contra o lume nos concellos menores de 20.000 habitantes, o bipartito non parece estar pola labor de asumir esta obriga”. En consecuencia “rematará una nova lexislatura e, pese as promesas e os discursos grandilocuentes das forzas do bipartito, A Mariña seguirá carecendo deste servizo”
SANIDADE PRETENDE OCULTAR A SÚA MALA XESTIÓN
Por outra banda, os populares indicaron que como unha mostra máis do desprezo co que a Xunta está a actuar en relación cos intereses da Mariña lucense, Sanidade está a obrigar a aquelas asociacións de veciños que desexan formar parte das comisións sanitarias de participación cidadá a integrarse na Federación Provincial. Todo iso, pese a que a lexislación vixente non establece esta obriga.
Segundo os dirixentes populares as trabas que desde o departamento que dirixe a socialista María José Rubio Vidal están a poñer á participación dos veciños da Mariña no órgano chamado a controlar e avaliar a calidade sanitaria da comarca ten explicación no intento de ocultar a situación real do sistema público de saúde, que se atopa moi deteriorado. “Sanidade pretende ocultar a súa mala xestión. Que os veciños da Mariña poñan de relevo as múltiples deficiencias que se están a producir nos centros de saúde e no Hospital da Costa nos últimos tres anos”