RIBADEO .- As obras de ampliación da Ponte dos Santos para o paso da autovía do Cantábrico (A-8) sobre a ría de Ribadeo ocasionaron na tarde de hoxe, luns, grandes retencións de tráfico como a que se ve na foto, que foi feita ás catro e media da tarde. Os cortes na estrada, que se facían de maneira alternativa en cada carril, duraron nalgúns casos quince minutos, polo que se ocasionaban longas colas de vehículos, moitos deles camións.
O tramo de autovía do Cantábrico que pasa pola Ponte dos Santos está a piques de rematarse e prevese a súa inauguración para antes do final deste ano. A plataforma da ponte xa foi ampliada nos dous sentidos e agora están realizando traballos coma o novo asfaltado.
